អន្តរជាតិ៖ តំណាងរដ្ឋាភិបាលចិន បានអះអាងច្បាស់ៗនៅថ្ងៃទី២៧ ខែតុលាម្សិលមិញនេះថា កោះតៃវ៉ាន់គ្មានសិទ្ធិចូលរួមក្នុងអង្គការសហប្រជាជាតិឡើយ។ ការអះអាងនេះបានធ្វើឡើង បន្ទាប់ពីសហរដ្ឋអាមេរិកបានបង្កើនភាពតានតឹងជាមួយនឹងការអំពាវនាវឱ្យដែនកោះដែលព្យាយាមប្រកាសអំពីអធិបតេយ្យរបស់ខ្លួននេះ ឱ្យចូលរួមកាន់តែជ្រៅនិងពេញមុខមាត់ក្នុងស្ថាប័នរបស់ពិភពលោកមួយនេះ។
នៅក្នុងសេចក្តីថ្លែងការណ៍រំលឹកខួប ៥០ឆ្នាំចាប់តាំងពីមហាសន្និបាតអង្គការសហប្រជាជាតិបានបោះឆ្នោតផ្តល់អាសនៈឱ្យទីក្រុងប៉េកាំង និងដកចេញទីក្រុងតៃប៉ិ រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយថា លោកមានការសោកស្តាយដែលតៃវ៉ាន់ត្រូវបានដកចេញឱ្យកាន់តែឆ្ងាយពីលើឆាកអន្តរជាតិ។ ខណៈដែលសហគមន៍អន្តរជាតិប្រឈមមុខនឹងបញ្ហាស្មុគស្មាញ និងជាសកលដែលមិនធ្លាប់មានពីមុនមក វាមានសារៈសំខាន់សម្រាប់អ្នកពាក់ព័ន្ធទាំងអស់ក្នុងការជួយដោះស្រាយបញ្ហាទាំងនេះ ដោយក្នុងនោះរួមមានប្រជាជនជាង ២៤លាននាក់ដែលរស់នៅកោះតៃវ៉ាន់ផងដែរ។ លោកបានបន្ថែមទៀតថា ការចូលរួមដ៏មានអត្ថន័យរបស់តៃវ៉ាន់ក្នុងអង្គការសហប្រជាជាតិ មិនមែនជាបញ្ហានយោបាយទេ ប៉ុន្តែជាតំរូវការជាក់ស្តែងមួយ នោះហើយជាមូលហេតុដែលយើងលើកទឹកចិត្តឱ្យរដ្ឋជាសមាជិកអង្គការសហប្រជាជាតិទាំងអស់ចូលរួមជាមួយយើងក្នុងការគាំទ្រការចូលរួមដ៏រឹងមាំ និងមានន័យរបស់តៃវ៉ាន់ក្នុងអង្គការសហប្រជាជាតិ និងសហគមន៍អន្តរជាតិផ្សេងទៀត។
ប្រទេសចិនបានចាត់ទុកកោះតៃវ៉ាន់ ជាកន្លែងដែលកងកម្លាំងជាតិនិយមបានភៀសខ្លួននៅឆ្នាំ១៩៤៩ បន្ទាប់ពីចាញ់សង្គ្រាមស៊ីវិល ថាជាខេត្តដែលរង់ចាំការបង្រួបបង្រួមឡើងវិញ ហើយការបង្រួមបង្រួមនេះក៏អាចនឹងត្រូវប្រើប្រាស់កម្លាំងបន្ថែមផងដែរ ប្រសិនបើក្នុងលក្ខខណ្ឌចាំបាច់។ លោក Ma Xiaoguang អ្នកនាំពាក្យនៃការិយាល័យកិច្ចការកោះតៃវ៉ាន់នាទីក្រុងប៉េកាំងបានបញ្ជាក់ថា៖ "តៃវ៉ាន់គ្មានសិទ្ធិចូលរួមជាមួយអង្គការសហប្រជាជាតិទេ។ អង្គការសហប្រជាជាតិ គឺជាអង្គការរដ្ឋាភិបាលអន្តរជាតិមួយ ដែលបង្កើតឡើង និងមានសមាជិកទ្រទ្រង់ដោយរដ្ឋអធិបតេយ្យ ប៉ុន្តែតៃវ៉ាន់ជាផ្នែកមួយនៃប្រទេសចិន"។ ការលើកឡើងរបស់អ្នកនាំពាក្យទទួលបន្ទុកកិច្ចការតៃវ៉ាន់នេះមានន័យបញ្ជាក់ច្បាស់ថា តៃវ៉ាន់ពុំមែនជារដ្ឋអធិបតេយ្យឡើយ ដោយតៃវ៉ាន់គឺជាខេត្តមួយរបស់ចិន។
លោកស្រី Tsai Ing-wen ប្រធានាធិបតីតៃវ៉ាន់បានថ្លែងមតិស្វាគមន៍ចំពោះសេចក្តីថ្លែងការណ៍របស់រដ្ឋមន្រ្តីការបរទេសអាមេរិក ដោយលោកស្រីបានសរសេរឆ្លើយតបនៅលើ Twitter ថា៖ "សូមថ្លែងអំណរគុណចំពោះ #ការគាំទ្រ របស់សហរដ្ឋអាមេរិកសម្រាប់ការពង្រីកការចូលរួមជាអន្តរជាតិរបស់ #តៃវ៉ាន់"៕
លោក Antony Blinken
លោកស្រី Tsai Ing-wen
ព័ត៌មានជាច្រើនទៀតសម្រាប់អ្នក
